Господи, Иисусе Христе, Сыне Божий, Ты бо рекл еси пречистыми усты Твоими: "Аминь глаголю вам, яко аще двое от вас совещаются на земли всякой вещи, ее же аще просите, будете иметь от Отца Моего, Иже на Небесех: где же два или трое собрались во имя Мое, ту есмь Аз посреде их". Непреложны словеса Твоя, Господи, милосердие Твое безприкладно и человеколюбию Твоему несть конца. Сего ради молим Тя: даруй нам, рабам Твоим (имена), согласившимся просить Тя о скором и благополучном строительстве храма в честь святого мученика Иоанна Воина, исполнения нашего прошения. Но обаче не якоже мы хотим, но якоже Ты. Да будет во веки воля Твоя. Аминь.

О преславный угодниче Христов Иоанне Воине! Храбр был еси в ратех, врагом прогонитель и обидимым заступник, ныне же всем православным христианам скорый помощник являешися. Помяни нас, грешных и недостойных и заступи нас в бедах, скорбех и печалех, и во всяцей злей напасти, и от всякаго злаго и обидящаго человека защити нас: тебе бо дана благодать от Бога молитися за ны, грешныя, в бедах и напастех зле страждущия. Избави убо нас от обидящих нас, буди нам поборник крепок на вся видимыя и невидимыя враги наша, да твоею помощию и крепким предстательством посрамятся вси являющии нам злая! О великий поборниче, Иоанне Воине, не забуди нас, всегда молящихся тебе и просящих твоея помощи и неоскудныя милости, и сподоби нас, грешных и недостойных раб, получити от Бога неизреченная благая, яже уготова Бог любящим Его, яко Тому подобает всякая слава, честь и поклонение, Отцу, и Сыну, и Святому Духу, ныне и присно и во веки веков. Аминь.